Нодирбек Абдусатторов ҳамон Озарбайжондаги турнирда пешқадам бўлиб турибди

Вугар Гашимов хотирасига бағишлаб ўтказилаётган анъанавий мусобақада дунёнинг номдор 10 гроссмейстерлари қаторида рапид бўйича амалдаги жаҳон чемпиони, Бутунжаҳон шахмат олимпиадаси ғолиби Нодирбек Абдусатторов ҳам бош соврин учун дона суряпти.

Fairmont Baku меҳмонхонасида ўтаётган мусобақанинг иккинчи кунги баҳслари ўз якунига етди. Бугун ҳамюртимиз кун давомида учта ўйин ўтказди ва уларнинг 1 тасида ғалаба, 2 тасида дуранг қайд этди. 

4-тур. Абдулла Гадимбайли (Озарбайжон) - Нодирбек Абдусатторов - 0,5 : 0,5

5-тур. Нодирбек Абдусатторов - Ванг Хао (Хитой) - 0,5 : 0,5

6-тур. Сэм Шенкленд (АҚШ) - Нодирбек Абдусатторов 0:1

6-турдан сўнг Абдусатторов ҳисобидаги очколар сони 10 тага етди. Шахматчимиз ҳамон мусобақани пешқадам сифатида бошқариб бормоқда. Унинг энг яқин таъқибчиси Рауф Мамедовда 9 очко бор. Хитойлик Ванг Хао эса 8 очко билан кучли учликка якун ясаган. 

Маълумот учун, Вугар Гашимов хотира турнири 2014 йилдан бери ўтказиб келинади. Илк мусобақа Вугар Гашимов туғилган Шамкирда ўтказилган. Амалдаги жаҳон тожи соҳиби Магнус Карлсен тўрт маротаба (2014, 2015, 2018, 2019) мусобақа ғолиби бўлди. Озарбайжонлик Шахрияр Мамедъяров икки бор (2016, 2017) чемпионлик шоҳсупасига кўтарилган. Америкалик Фабиано Каруана амалдаги (2021) чемпион ҳисобланади.