Нодирбек Абдусатторов иштирок этган турнирда саралаш босқичи якунланди

Мукофот жамғармаси 150 минг АҚШ долларини ташкил этувчи мазкур турнирда сайёрамизнинг энг кучли гроссмейстерлари иштирок этяпти. Улар орасида ҳамюртимиз, рапид йўналиши бўйича амалдаги ва шу билан бирга энг ёш жаҳон чемпиони Нодирбек Абдусатторов (2651) ҳам ўз имкониятини синаб кўрди. 

Кеча тунда дунёнинг 16 нафар кучли гроссмейстерлари сўнгги 3 та партияда ўзаро дона суришди ва афсуски, Абдусатторов ўтказилган партияларда 1 дуранг ва 2 мағлубият қайд этди. Бу эса ёш гроссмейстеримизнинг якунда кучли саккизталикка кириб олиши учун етарли бўлмади. 

Абдусатторов 13-турда польшалик Ян-Кшиштоф Дуда (2806) билан муросага келди. Кейин эса номдор рақиблари, америкалик Левон Аронян (2719) ва озарбайжонлик Шахрияр Мамедияров (2722)га имкониятни бой бериб қўйди. Шу тариқа, Нодирбек саралаш босқичини 19 очко билан 11-12 ўринда якунлади. 

Саралаш босқичини россиялик гроссмейстер Ян Непомняший 29 очко жамғарган ҳолда якка пешқадам сифатида тугатди. Амалдаги жаҳон тожи соҳиби Магнус Карлсен 25 очко билан иккинчи ўринни эгаллади. Йигирма тўрттадан очко жамғарган Артемьев ва Есипенко учинчи ҳамда тўртинчи поғонадан жой олишди. 

Саралаш якуни. 1. Непомнящий - 29 очко; 2. Карлсен - 25; 3-4.  Артемьев, Есипенко - 24 очкодан; 5. Хансен - 23; 6-8. Дин Лижень, Ле Куанг Льем, Каймер - 22 очкодан;

9-10. Аронян, Гири - 21 очкодан; 11-12. Прагнанандха, Нодирбек Абдусатторов - 19 очкодан; 13-14. Дуда, Мамедияров - 17; 15. Ниманн - 15; 16. Костенюк - 3. 

Саралаш босқичи якунига кўра энг яхши натижа қайд этган 8 нафар шахматчи плей-офф босқичида ғолиблик учун курашни давом эттиради. 

1/4 финал жуфтликлари:

Ян Непомняший (Россия, 2773) - Винсент Каймер (Германия), 2664

Эрик Хансен (Канада, 2606) - Андрей Есипенко (Россия, 2714)

Владислав Артемьев (Россия, 2700) - Лирен Динг (Хитой, 2799)

Ле Куанг Льем (Вьетнам, 2709) - Магнус Карлсен (Норвегия, 2865)