Нодирбек Абдусатторов яна 4 партияда номдор рақибларига қарши дона сурди

Мукофот жамғармаси 150 минг АҚШ долларини ташкил этувчи мазкур турнирда сайёрамизнинг энг кучли гроссмейстерлари иштирок этяпти. Улар орасида ҳамюртимиз, рапид йўналиши бўйича амалдаги ва шу билан бирга энг ёш жаҳон чемпиони Нодирбек Абдусатторов (2651) ҳам бор.

Биринчи кун ўтказилган 4 та партияда Абдусатторов ҳеч бир рақибига ютқазмаганди. Яна бир муҳим жиҳат, амалдаги жаҳон тождори Магнус Карлсен (2865) бу сафар ҳам ёш гроссмейстеримизни мағлуб эта олмаган эди. Карлсенга қарши қора доналарда ҳаракат қилган Нодирбек дуранг натижа қайд этганди. Айнан Магнус ушбу мусобақанинг амалдаги ғолиби ҳисобланади. 

Кеча Абдусатторов мусобақа доирасида яна 4 та партия ўтказди. Ёш гроссмейстеримиз 5-турда жаҳон тожига сўнгги даъвогар, россиялик Ян Непомняший (2773) билан қора доналарда ўйнади ва имкониятни бой берди. Олтинчи турда аёллар ўртасида 12-Жаҳон чемпиони, россиялик Александра Костенюк (2516)ни мағлубиятга учратди. Еттинчи партияда қора доналарда ўйнади ва германиялик халқаро гроссмейстер Винсент Кеймер (2664)га ютқазиб қўйди. Саккизинчи турда АҚШ вакили Ханс Ниеменн (2642)дан устун келди. 

Шу тариқа, Нодирбек Абдусатторов иккинчи кунги баҳсларда 2 ғалаба ва 2 мағлубият қайд этди. Бугун ҳамюртимиз 9-турда ҳиндистонлик Прагнанандха (2612), 10-турда вьетнамлик Лием Куанг Ле (2709), 11-турда канадалик Эрик Хансен (2606), 12-турда эса хитойлик Лирен Динг (2799) билан ҳисоб-китоб қилади.       

Маълумот учун, 16 халқаро гроссмейстер иштирокидаги мусобақа рапид йўналишида ўтказаётган бўлиб, дастлаб иштирокчилар 15 турдан иборат саралаш босқичида ўзаро куч синашади. Шахматчилар тўплаган ҳар бир очкоси учун 250 доллардан мукофот олишади. Саралаш босқичи якунига кўра энг яхши натижа қайд этган 8 нафар шахматчи плей-офф босқичида ғолиблик учун кураш олиб боради. Бу босқичда ҳар бир ўйин муҳим аҳамиятга эга ва ютқазган шахматчи учун мусобақа тугайди.

Эслатиб ўтамиз, яқинда Польшада ўтказилган жаҳон чемпионатида Нодирбек Абдусатторов Магнус Карлсенни шов-шувли тарзда мағлубиятга учратган эди.