Нодирбек Абдусатторов яна бир бор Магнус Карлсенга қарши дона сурди

Мукофот жамғармаси 150 минг АҚШ долларини ташкил этувчи мазкур турнирда сайёрамизнинг энг кучли гроссмейстерлари иштирок этяпти. Улар орасида ҳамюртимиз, рапид йўналиши бўйича амалдаги ва шу билан бирга энг ёш жаҳон чемпиони Нодирбек Абдусатторов (2651) ҳам бор.

Қувонарлиси, кеча ўтказилган 4 та партияда Абдусатторов ҳеч бир рақибига ютқазмади. Яна бир муҳим жиҳат, жаҳон тождори Магнус Карлсен (2865) бу сафар ҳам ёш гроссмейстеримизни мағлуб эта олмади. Карлсенга қарши қора доналарда ҳаракат қилган Нодирбек дуранг натижа қайд этди. Айнан Магнус ушбу мусобақанинг амалдаги ғолиби ҳисобланади. 

Абдусатторов мусобақадаги иштирокини нидерландиялик Аниш Гири (2772)га қарши баҳс билан бошлади. Ушбу партияда томонлар муросага келишди. Иккинчи турда Карлсен - Абдусатторов учрашуви бўлиб ўтди. Учинчи турда ҳамюртимиз оқ доналар россиялик Владислав Артемьев (2700) билан дуранг ўйнади. Тўртинчи турда эса яна бир рус гроссмейстери Андрей Есипенко (2714) билан муросага келди. 

Шу тариқа, биринчи кунги баҳсларда Нодирбек Абдусатторов ёмон таассурот қолдирмади. Бугун ёш гроссмейстеримиз 5-турда россиялик Ян Непомняший (2773) билан қора доналарда ўйнайди. Олтинчи турда аёллар ўртасида 12-Жаҳон чемпиони, россиялик Александра Костенюк (2516) билан учрашади. 

Маълумот учун, 16 халқаро гроссмейстер иштирокидаги мусобақа рапид йўналишида ўтказаётган бўлиб, дастлаб иштирокчилар 15 турдан иборат саралаш босқичида ўзаро куч синашади. Шахматчилар тўплаган ҳар бир очкоси учун 250 доллардан мукофот олишади. Саралаш босқичи якунига кўра энг яхши натижа қайд этган 8 нафар шахматчи плей-офф босқичида ғолиблик учун кураш олиб боради. Бу босқичда ҳар бир ўйин муҳим аҳамиятга эга ва ютқазган шахматчи учун мусобақа тугайди.

Эслатиб ўтамиз, яқинда Польшада ўтказилган жаҳон чемпионатида Нодирбек Абдусатторов Магнус Карлсенни шов-шувли тарзда мағлубиятга учратган эди. Ўша ғалаба тасодифий бўлмагани кечаги учрашувда ўз исботини топди.