Нодирбек Абдусатторов яна Магнус Карлсенга қарши дона суради

Мукофот жамғармаси 150 минг АҚШ долларини ташкил этувчи мазкур турнир ўз атрофига дунёнинг энг кучли шахмат усталарини жамлагани билан аҳамиятли. Улар орасида ҳамюртимиз, рапид йўналиши бўйича энг ёш жаҳон чемпиони Нодирбек Абдусатторов ҳам бор.

Мусобақа рапид йўналишида ўтказилиб, дастлаб иштирокчилар 15 турдан иборат саралаш босқичида ўзаро куч синашади. Шахматчилар тўплаган ҳар бир очкоси учун 250 доллардан мукофот олишади. Саралаш босқичи якунига кўра энг яхши натижа қайд этган 8 нафар шахматчи эса плей-офф босқичида ғолиблик учун кураш олиб боради. Бу босқичда ҳар бир ўйин муҳим аҳамиятга эга ва ютқазган шахматчи учун мусобақа тугайди.

Қуръа натижасига кўра саралаш баҳсларида Нодирбек Абдусатторов кимларга қарши дона суриши ҳам маълум бўлди. Унга кўра, 1-турда ҳамюртимиз нидерландиялик машҳур шахмат устаси Аниш Гири билан куч синашса, иккинчи раундда жаҳон тождори, ушбу мусобақанинг амалдаги ғолиби Магнус Карлсенга қарши дона суради.

Мазкур ўйинга қизиқиш ниҳоятда юқори бўлиши табиий, зеро Карлсен яқинда Польшада ўтказилган жаҳон чемпионатидаги мағлубият учун реванш олишга ҳаракат қилса, Нодирбек ўша ғалаба тасодиф эмаслигини исботлашга уринади.

Шунингдек, саралаш босқичида Абдусатторовга қарши дунё тан олган шахмат усталари – Ян Непомняший (Россия), аёллар ўртасида 12-жаҳон чемпиони Александра Костенюк (Россия), дунё рейтинги пешқадамларидан Дин Лижен (Хитой), қолаверса Ян Кшиштоф Дуда (Польша), Левон Аронян (Арманистон), Шахриёр Мамадиёров (Озарбайжон) ва бошқалар дона суришади.

Биз Нодирбекка ушбу мусобақада омад ва зафарлар ёр бўлишини тилаймиз.