Новак Жокович Якуний ATP турнири ғолиби + ФОТОГАЛЕРЕЯ

Ҳал қилувчи финал учрашувида дунёнинг биринчи ракеткаси, сербиялик Новак Жокович ATP рейтингида тўртинчи поғонада бораётган италиялик Янник Синнерга қарши кортга чиқди. Бир юз уч дақиқа давом этган баҳсда Жокович ўз ватандошлари кўз ўнгида ўйнаган мезбон теннисчига деярли имкониятни қолдирмади - 6/3, 6/3.

Новак теннисчиларнинг ўзаро учрашувларидаги ҳисоб устунлигини мустаҳкамлади - 4:1. Жокович 13, Синнер 8 та эйс зарбасини амалга оширган. Сербиялик теннисчи умуман қўшхатога йўл қўймади, италияликда бу кўрсаткични биттани ташкил этди. Брейклар бўйича мутлақ устунлик чемпионда - 3 га 0. 

Эътиборлиси, гуруҳ босқичида ҳам бу икки теннисчи ўзаро тўқнаш келишган ва ўшанда Синнер ғалаба қозонганди. Жокович Якуний ATP турнирининг етти карра (2008, 2010, 2011, 2014, 2015, 2022, 2023) чемпионига айланди. Бу борада у афсонавий Рожер Федерердан ўзиб кетди ва мутлақ рекордчига айланди. 

Туриндаги муваффақиятли иштирок Новак Жоковичга 1300 рейтинг очкоси ҳамда 4 миллион 411 минг 500 АҚШ доллари миқдоридаги мукофот пулини келтирди. Бу билан у ўтган йилги чемпионлик унвонини ҳам ҳимоя қилди ва мавсумни рейтинги пешқадами сифатида якунлайди.