Одилжон Аслонов: "Дилшодбек Рўзметов билан 4 марта тўқнаш келиб, 3 тасида ғалаба қозонганман"

- Ўзбекистон чемпионатига жиддий ёндошамиз. Дилшодбек Рўзметовга эмас, балки барча рақибларга жиддий қараймиз. Чунки бу Ўзбекистон чемпионати. Ҳар хил номлар, ёш боксчилар кашф этилиши мумкин. Шунинг учун биз бирор рақибга оддий назар билан қарамаймиз. 

- Бу ерда рақиб бўлсангиз-да, аслида барча боксчилар билан бир жамоасизлар...

- Биз бир жамоамиз ва ҳаммамизнинг мақсадимиз Ўзбекистон байроғини баландга кўтариш. 

- Дилшодбек Рўзметов сиз учун азалий рақиб ҳисобланади. У билан умумий неча марта учрашгансиз ва ҳисоб қанақа кўринишда?

- Дилшодбек Рўзметов билан адашмасам тўрт марта тўқнаш келганмиз. Руминиядаги турнирда финалга чиққанимизда жароҳатим борлиги туфайли рингга чиқмаганман ва менга техник мағлубият ёзилган. Шукрки, қолган барча жангларда ғалаба қозонганман. 

- Ўз вазнингизда олдинда турган жаҳон чемпионатида асосий номзодсиз... 

- Ҳамза Авезов, Равшан Ходжаев ва Нодир Ғуломов билан мақсадимиз бор. Шунга қараб ҳаракат қиляпмиз. Худо хоҳласа, бу ғалабани жаҳон чемпионати ва Осиё ўйинларига биринчи қадам деб ҳисоблайман. 

- Проф боксдаги фаолиятингиз қандай давом этяпти?

- Промоутерлар бизга алоқага чиқишяпти. Улар менга жанг беришмоқчи. Ҳозирча асосий мусобақаларни ўтказиб, юртимиз шарафини муносиб ҳимоя қилганимдан кейин проф боксга қайтиш ниятим бор.