Россияда рингга чиққан тўрт боксчимиздан фақат бирида ғалаба

Турнир доирасида тўрт нафар ўзбекистонлик чарм қўлқоп устаси рингга чиқди. Дастлаб, андижонлик Шаҳбозбек Толибжонов тожикистонлик Асрор Воҳидовга қарши рингга кўтарилди. Енгил вазндаги 6 раундлик жанг тўлиқ давом этиб, унда Воҳидов (13-1) очколар ҳисобига кўра ғолиб деб топилди.

Сўнгра ҳаваскор боксда жаҳон чемпионати совриндорига айланган Саиджамшид Жафаров проф боксдаги дебют жангини  ўтказди. Россиялик Гор Оганесянга қарши кечган баҳсда ҳамюртимиз очколар ҳисоби билан ғалаба қозонди.

Жиззахлик Бобоусмон Батуров эса профессионал рингдаги бешинчи жангини британиялик Мишель Кингга қарши ўтказди. Саккиз раундлик жанг тўлиқ давом этиб, якунда дуранг натижа қайд этилди.

Ҳамюртларимиз орасидаги сўнгги жанг Одилжон Аслонов иштирокида ўтди. Суперўрта вазн тоифасидаги боксчимиз россиялик Никита Зонга муддатидан олдин, 6 раундда мағлуб бўлди. Жанг WBA Asia камари учун ўтказилганди.

Шу тариқа, RCC Boxing оқшомида рингга чиққан тўрт нафар ўзбекистонлик боксчи 1 ғалаба, 1 дуранг ва 2 мағлубият қайд этди.