Олимпиада медалига сазовор бўлган Иван Ефремовга ҳукумат томонидан мукофот бериладими? Ушбу саволга жавоб берилди

У 2012 йилги Олимпия ўйинларида бешинчи ўринни эгаллаганди. Аммо, ўша ўйинларда учинчи ва тўртинчи ўринни банд этган спортчиларнинг таҳлилидан тақиқланган моддалар топилганди. Шу сабабли, бронза медали ҳамюртимиз Иван Ефремовга насиб қилди.

Бугун Тошкентда ўтказилган тадбир давомида Ефремовга Олимпиада медали тантанали тарзда топширилди.

Маълумки, Ўзбекистон ҳукумати Олимпия ўйинларида совриндор бўлган спортчиларни пул мукофоти билан тақдирлайди. Демак, қоида бўйича Ефремов ҳам тақдирланиши лозим.

Тадбир давомида ОАВ ходимлари ушбу масала юзасидан савол билан мурожаат қилишди. Саволга МОҚ раисининг биринчи ўринбосари Равшан Эрматов жавоб берди:

"Ушбу янгилик жуда тезда содир бўлди. Олимпиада медаллари ҳам яқиндагина етиб келди. Биз бу борада ҳукуматга мурожаат қилдик. Яхши биласиз, Ўзбекистонда Олимпиадада совриндор бўлган спортчи эътиборсиз қолмайди. Иван Ефремов албатта тақдирланади", - деди Равшан Эрматов.