Равшан Эрматов U-20 Жаҳон чемпионати санаси, янги стадион очилиши ҳамда Осиё кубоги мезбонлиги ҳақида гапирди

Жаҳон чемпионатига тайёргарлик жараёни
2027 йил бўлиб ўтадиган ёшлар ўртасидаги мундиални Ўзбекистон ва Озарбайжон давлатлари биргаликда қабул қилади. Кичик мундиал куз ойларида (сентябрь-октябрь) ўтказилиши режалаштирилмоқда. Ушбу нуфузли мусобақага юқори савияда тайёргарлик кўриш мақсадида ФИФА билан ҳамкорликда махсус маҳаллий ташкилий қўмита – "LOC" ишчи гуруҳи тузилган. Ҳозирги кунда мазкур гуруҳ томонидан барча муҳим йўналишлар бўйича ишлар олиб борилмоқда:

• Стадионлар ва машғулот майдонларининг ҳолати;

• Меҳмонхоналар ва йўл инфратузилмаси;

• Чипталар сотуви (тикетинг) ва маркетинг масалалари.

Янги Тошкентда барпо этилаётган замонавий стадион
Мезбонлик доирасидаги энг йирик лойиҳалардан бири – Янги Тошкент ҳудудида барпо этилаётган замонавий стадион ҳисобланади. Равшан Эрматовнинг таъкидлашича, мазкур ўйингоҳ айнан 2027 йилги Жаҳон чемпионати арафасида фойдаланишга топширилиши режалаштирилган ва бу халқимиз учун яна бир муҳташам спорт иншооти сифатида тақдим этилади.

Осиё Кубогига мезбонлик қилиш режалари
Шунингдек, ЎФА расмийси инфратузилмавий янгиланишлар келгусида янада йирик турнирларни қабул қилишга замин яратишини айтиб ўтди. Маълумки, Ўзбекистон ўз тарихида ҳали бирор марта миллий терма жамоалар ўртасидаги Осиё Кубогига мезбонлик қилмаган. Бунга асосан стадионлар сиғими ва инфратузилмадаги айрим камчиликлар сабаб бўлган.

Аммо Янги Тошкентдаги стадионнинг қурилиши, мавжуд ўйингоҳларнинг реконструкция қилиниши ва янги ареналарнинг фойдаланишга топширилиши бу борадаги имкониятларни кенгайтиради. Келажакда Ўзбекистон бундай йирик мусобақаларни, жумладан, катталар ўртасидаги Осиё кубогини қўшни давлатлар билан ҳамкорликда ўзида қабул қилишни мақсад қилган. Равшан Эрматов ушбу ташаббус ўзбек футболи мухлисларига манзур бўлишига умид билдирди.