Осиё чемпионати. "Классикларимиз" биринчи кунни 2 та олтин, 2 та кумуш медаль билан якунлашди

Қувонарлиси, бугунги беллашувларда иштирок этган 4 нафар юнон-рум курашчимизнинг бари медалларга эга чиқди. Улардан биринчилардан бўлиб Шермуҳаммад Шарибжонов Осиё чемпионлигини расмийлаштириб олди. 60 кг вазндаги юнон-рум курашчимиз олтин медаль учун кечган баҳсда қирғизистонлик Нурмуҳаммет Абдуллаевни 9-0 ҳисобида доғда қолдирди.

Осиё чемпионлиги учун асосий даъвогар ҳисобланаётган юртдошимиз Аброр Атабаев бу тахминларни амалда оқлади. Яқиндагина Қозоғистонда ўтган катталар ўртасидаги нуфузли рейтинг турнири ғолиби бўлган Атабаев энди ёшлар орасида Осиё чемпионига айланди. У финал учрашувида қирғизистонлик Азамат Саматни 10-0 ҳисобида доғда қолдирди ва Ўзбекистон терма жамоасига иккинчи олтин медални тақдим этди.  

72 кг вазнда юртимиз шарафини ҳимоя қилган Жаҳонгир Ҳамроев Осиё чемпионатининг кумуш медалига сазовор бўлди. Ҳамюртимиз Осиё чемпионлиги учун кечган муросасиз баҳсда қирғизистонлик Адилхан Нурланбековга 2-4 ҳисобида ютқазиб қўйди. 

77 кг вазнда юртимиз шарафини ҳимоя қилган Дилшод Омонгелдиев финал учрашувида қирғизистонлик Акилбек Талантбековга имкониятни бой (0-9) бериб, Осиё чемпионатининг кумуш медалига сазовор бўлди. 

Шу тариқа, юнон-рум курашчиларимиз биринчи кунги беллашувларни 2 та олтин, 2 та кумуш медали билан якунлашди. Эртага қолган вазн тоифаларида медаллар учун беллашувлар давом эттирилади.