Осиё мамлакати ассоциацияси ФИФА аъзолигидан чиқарилди

Халқаро футбол федерацияси (ФИФА) Бутун непал футбол ассоциациясининг (ANFA) ташкилотга аъзолигини вақтинча тўхтатиш ҳақида қарор қабул қилди ҳамда мамлакат терма жамоаси ва клубларига халқаро турнирларда иштирок этишни тақиқлади. 

ФИФА бош котиби Маттиас Графстрёмнинг ANFA раҳбари Киран Райга йўллаган хатига кўра, ушбу қарор Миллий спорт кенгаши (NSC) томонидан ФИФА уставининг "қўпол равишда бузилиши", улар ўртасида футбол ассоциациясидаги сайлов жараёнига оид ҳал этилмаган низо ҳамда сайловларга учинчи шахсларнинг аралашуви билан боғлиқ.

ANFA ФИФА аъзоси сифатидаги барча ҳуқуқларидан маҳрум бўлади. Ассоциация ва унинг вакиллари эндиликда ФИФА ҳамда Осиё футбол конфедерацияси (AFC) томонидан ташкил этиладиган ривожланиш дастурлари, курслар ёки машғулотларда иштирок эта олмайдилар.

ФИФА ANFA аъзолигини тиклаш учун иккита шарт қўйди. Биринчиси: NSC'нинг 25 мартдаги қарорини тўлиқ ва сўзсиз бекор қилиш. Ўшанда Бутуннепал футбол ассоциацияси ижроия қўмитаси фаолияти уч ойга тўхтатиб қўйилган ва улар сайловларни спорт ташкилотининг розилигисиз ўтказишда ҳамда халқаро ташкилотлар кўрсатмаларини миллий қонунчиликдан устун қўйишда айбланган эди. Иккинчиси: ANFA'га бошланган сайлов жараёнини ўз уставига мувофиқ якунлаш имкониятини бериш.

Нусхаси Осиё футбол конфедерациясига (AFC) ҳам юборилган ушбу хатда тақиқ "кейинги огоҳлантиришгача" кучида қолиши таъкидланган. Шунингдек, ФИФА қабул қилинган қарор ҳақида ўзининг барча аъзоларини огоҳлантирган.