Ўзбек ва жаҳон спорти афсонаси Оксана Чусовитина 48 ёшда!

Чусовитина Оксана Александровна 1975 йил 19 июнь куни Бухоро шаҳрида туғилган. Спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020). 1992 йил Барселонада ўтган Олимпия ўйинлари олтин медали соҳибаси, 3 карра жаҳон чемпиони. Таяниб сакраш, эркин машқ ва параллель тўсинларда бир неча мураккаб элементлар муаллифи. Осиё ўйинлари ва Осиё чемпионати ғолибаси.  

Фаолиятини якунламасдан туриб, гимнастика ривожига қўшган хиссаси учун Халқаро гимнастика шон-шараф Залидан ўрин олган ягона спортчи (шунингдек, спорт гимнастикасида Олимпия ўйинларида энг кўп иштирок этгани учун “Гиннеснинг рекордлари” китобига ўз номини ёздириб қўйган).

Оксана Александровна давлатимиз томонидан “Ўзбекистон ифтихори”, "Ўзбекистон Республикасида хизмат кўрсатган спортчи" фахрий унвонлари, “Дўстлик”, “Меҳнат шуҳрати”, “Эл-юрт ҳурмати” орденлари билан тақдирланган.

Оксана Чусовитина 8 бор Олимпия ўйинларида иштирок этиб, гимнастика тарихи ва “Гиннеснинг рекордлари” китобига киритилган. Агар у Париж-2024 Олимпиадасида ҳам иштирок этса, ўз рекордини яқин давр ичида ҳеч ким яқинлаша олмайдиган қилиб янгилайди. Яна ҳам ҳайратланарлиси, ўшанда у 49 ёшида бу ишни амалга оширган бўлади.

Фурсатдан фойдаланиб, Ўзбекистон фахри Оксана Чусовитинани бугунги таваллуд айёми билан табриклаб, унга узоқ умр, сиҳат-саломатлик ва улкан ғалабалар тилаймиз.