Ўзбекистон давлат жисмоний тарбия ва спорт университетига янги проректор тайинланди

Дастлаб Р.Эрматов университетда талабалар учун яратилган шарт-шароитлар, 2020/2021 ўқув йили қабул жараёнлари бўйича абитуриентлар, уларнинг ота-оналари ва фуқароларни қизиқтирган саволларига ҳамда мурожаатларига тез ва аниқ жавоб бериб бориш мақсадида ташкил этилган консультация хонаси фаолияти ҳамда Call center хизмати билан танишди.

Шундан кейин Ўзбекистон давлат жисмоний тарбия ва спорт университетда навбатдан ташқари йиғилиш ўтказилди. Унда Жисмоний тарбия ва спорт вазирнинг биринчи ўринбосари Эрматов Равшан Сайфутдинович ҳамда университет раҳбарияти ва профессор-ўқитувчилар, ходимлар иштирок этишди.

Йиғилишга раислик қилган Жисмоний тарбия ва спорт вазирнинг биринчи ўринбосари Равшан Эрматов сўнгги йилларда юртимизда жисмоний тарбия ва спортни оммалаштиришга қаратилган кенг ислоҳотлар амалга оширилаётганини алоҳида таъкидлади. Шу билан бирга университет раҳбариятида ташкилий ўзгаришлар юз берганлиги маълум қилинди.

Ўзбекистон Республикаси Жисмоний тарбия ва спорт вазирининг тегишли буйруғи билан Ахмедов Икром Акрамович Ўзбекистон давлат жисмоний тарбия ва спорт университетининг ўқув ишлари бўйича проректори лавозимига тайинланди.

Икром Ахмедов 1965 йилда Самарқанд вилояти Нурота тумани (ҳозирги Навоий вилояти)да туғилган. 1989 йилда Тошкент халқ хўжалиги институти институтини (ҳозирги Тошкент давлат иқтисодиёт университетини), тамомлаган.

У меҳнат фаолиятини 1989 йилда иқтисодчи лавозимидан бошлаб, 1994-1996 йилларда Тошкент давлат иқтисодиёт университети аспиранти,

1996-2003 йилларда Тошкент давлат иқтисодиёт университетининг «Маркетинг ва ташқи иқтисодий фаолият» кафедраси катта ўқитувчиси, 2003-2010 йилларда Тошкент давлат иқтисодиёт университетида декан муовини,

2011-2018 йилларда Тошкент давлат иқтисодиёт университетининг академик лицей ва касб ҳунар коллежлари билан ишлаш бўйича проректори лавозимларида фаолият олиб борган.

Иқтисодиёт фанлари номзоди – Икром Ахмедов шу кунгача Ўзбекистон давлат жисмоний тарбия ва спорт университетининг «Спортни бошқариш ва касбий фанлар» факультети декани сифатида ишлаб келаётганди.