Ўзбекистон дзюдо федерацияси раисининг мурожаати

Ҳурматли ҳамкасблар! Қадрли дўстлар!

Ўзбекистон дзюдо федерацияси номидан сизларга соғлик-саломатлик тилаган ҳолда коронавирус пандемияси бўйича вазият юмшаётганига умид билдириб қоламан. 

Бундай синовли кунларда бутун дунёда бўлгани каби бизнинг мамлакатимизда ҳам спортчилар, хусусан дзюдочилар одатдаги тўлақонли машғулот ўтказиш имкониятидан маҳрум бўлиб турибди. Лекин бу ҳолат спортчиларга жисмоний тайёргарликларига беэътибор бўлиш, спорт формаларини ушлаб турмаслик учун баҳона бўлмаслиги керак. Улар ғалабаларга ҳамиша чанқоқ ҳамда тайёр турмоқлари шарт. 

Юқорида келтирилган талаб ва меъёрларни инобатга олган ҳолда Халқаро дзюдо федерацияси дунё дзюдо ҳамжамияти учун IJF FIT онлайн-платформасини йўлга қўйди. Онлайн-платформа динамик ҳамда оригинал фитнес-машғулотлардан иборат бўлиб, жаҳоннинг кўзга кўринган дзюдо усталари томонидан бажарилган. Бу орқали улар сайёрамизнинг барча дзюдочиларини ҳаракатда бўлишга, бир-бирлари билан мусобақалашишга чорлашган, даъват этишган. Сайтда пешқадам иштирокчиларнинг Рейтинг жадвали эълон қилиб борилади.

Бундай синовли кунларда биз бирлашишимиз, бир-биримизга бўлган ҳурмат ва эътиборни амалда намойиш этишимиз керак. Дзюдо асосчиси Дзигоро Кано айтганидек: "Қийин дамларда қатъиятли бўлинг, ақл билан иш юритинг ва жамиятни янада яхшилашга ўз ҳиссангизни қўшинг". 

Ушбу онлайн-платформа саломатликни мустаҳкамлаш, жисмоний ҳолатни меъёрда ушлаб туриш, севимли спорт туримизни янада оммалаштириш ҳамда кўзга кўринган дзюдочилар билан янги форматда учрашиш имконини беради. 

Сизларни юқорида айтилган масалаларга амал қилишга ҳамда янги лойиҳанинг оммалашишида фаол бўлишга чақираман. 

Бунинг учун сизга олдиндан миннатдорчилик билдираман. 

Сизларга соғлиқ-саломатлик ҳамда тезроқ тўлақонли спорт ҳаётига қайтишни тилайман!

Ҳурмат билан,

Ўзбекистон дзюдо федерацияси раиси А.Камилов