Ўзбекистон мотокросс терма жамоаси халқаро мусобақа совриндори

Россия, Арманистон, Беларусь, Жанубий Осетия, Қозоғистон, Ўзбекистон, Қирғизистон, Тожикистон, Озарбайжон, Мўғулистон, Жанубий Корея, Хитой, Ҳиндистон, Туркия ва Италиянинг кўзга кўринган мотокроссчилари 65 куб см, 85 куб см, 125 куб см (аёллар, ёшлар), “МХ1”, “МХ2” ва “МХ Оpen” синфларида беллашдилар.

Айтиш мумкинки, ушбу нуфузли мусобақани икки кун давомида бутун дунё бўйлаб экстремал спорт мухлислари катта қизиқиш ва ҳаяжон билан кузатдилар.

Қувонарлиси, халқаро кубок мусобақасида Ўзбекистон Республикаси мудофаасига кўмаклашувчи “Ватанпарвар” ташкилоти спортчиларидан иборат Ўзбекистон миллий терма жамоаси аъзолари – Эмран Аблязов 125 куб см (“МХ2”), Жасур Саматов 250 куб см (“МХ1”) ва Константин Сичёв “МХ Оpen” синфларида қатнашиб, умумжамоа ҳисобида фахрли учинчи ўринни эгалладилар.

Биринчи ўрин Россия, иккинчи ўрин эса Қозоғистон терма жамоаларига насиб этди. Ғолиблар ва совриндорлар ташкилотчиларнинг белгиланган пул мукофотлари, медаллари ва эсдалик совғалари билан тақдирландилар.

Ўзбекистон Республикаси мудофаасига кўмаклашувчи “Ватанпарвар” ташкилоти матбуот хизмати