Ўзбекистон ва Саудия Арабистони: Осиё ўйинларидаги тўқнашувларда қандай натижалар қайд этганмиз?

Турнирнинг футбол ўйинларида Ўзбекистон олимпия терма жамоаси гуруҳ босқичини юз фоизлик натижа билан якунлади. Энди улар чорак финалда Саудия Арабистони билан тўқнаш келади. “Оқ бўрилар” Осиё ўйинлари доирасида бунга қадар 3 маротаба бу юрт вакилларига қарши ўйнаган.

1. Хиросима-1994: Ёрқин дебют ва йирик ғалаба

Ўзбекистон миллий терма жамоаси учун тарихий ҳисобланган 1994 йилги Хиросимадаги Осиё ўйинлари айнан Саудия Арабистонига қарши гуруҳ босқичининг 1-тур ўйини билан бошланган. Мусобқа дебютантлари рақиб дарвозасига жавобсиз голлар ёғдириб, йирик ҳисобдаги ғалабани қўлга киритган. Бу ўзининг илк катта мусобақасини ўтказаётган терма жамоа учун ажойиб онлар эди.

Ўша учрашувда Сергей Лебедев (14), Миржалол Қосимов (23) ҳамда Игорь Шквириннинг дубли (25, 43) вакилларимизга ишончли устунликни тақдим этган. Саудияликлар фақатгина ўйин охирида – 90-дақиқада Ал Жоҳанининг кучи билан битта гол уришга муваффақ бўлишган холос. Якуний натижа – 4:1.

2. Инчеон-2014: Аламли мағлубият

Орадан йигирма йил ўтиб, 2014 йилги Инчеон мезбонлик қилган Осиё ўйинларида тақдир жамоаларни яна тўқнаштирди. Бу сафар нимчорак финал босқичида кечган баҳс жуда асабий ва кескин курашларга бой ўтди. 20 йил олдин арабларга гол урган Миржалол Қосимов бу сафар мураббий сифатида захира ўриндиғида ўтирарди.

Ўйин шиддати меҳмонларнинг юқори фаоллиги билан давом этиб, Саудия Арабистони 2:3 ҳисобидаги ғолабани тантана қилган. Ўзбекистон сафида Жамшид Искандеров (45+1) ва Воҳид Шодиев (70) ўз номларини таблога ёздириб қўйган бўлса-да, Ал Гамдининг голи, Бобур Йўлдошевнинг ўз дарвозасини ишғол қилиб қўйиши (автогол) ҳамда ҳакам қўшиб берган дақиқаларда (90+5) Ал Биши киритган тўп вакилларимизнинг мусобақадаги юришини тўхтатган эди.

3. Ханчжоу-2023: Реванш ва ярим финал сари қадам

Хитойнинг Ханчжоу шаҳрида ўтган 2023 йилги Осиё ўйинларининг чорак финал баҳси ўзбек футбол мухжислари учун ўзгача қувонч келтирди. Учрашувдан олдин мутахассислар Саудия Арабистонини фаворит сифатида кўрсатишган бўлса-да, вакилларимиз матонат кўрсатиб, муҳим ғалабани қўлга киритишди. Бу авлод терма жамоаси бунга қадар ҳам бир нечта турнирларда куч синашган ва имкониятни бой берган эди.

Учрашувда Саидазамат Мирсаидов (24) ва ҳужумчи Алишер Одилов (43) киритган голлар терма жамоамизга қулай устунлик тақдим этди. Рақиблар сафидан Ҳалил Маран (66) фарқни қисқартирган бўлса-да, вакилларимиз ҳимояда интизомли ҳаракат қилиб, ҳисобни сақлаб қолишди ва кейинги босқичга йўл олишди. Якуний натижа – 2:1.

Маълумот учун, Ўзбекистон - Саудия Арабистони учрашуви 25 сентярбрь куни соат 10:00 да старт олади.

Абдулазиз Искандаров тайёрлади