Ўзбекистонлик ёнғин ўчирувчилар жаҳон чемпионатида иштирок этишди

Ушбу мусобақада Россия, Беларусь, Чехия, Украина, Мўғулистон, Озарбайжон, Словакия, Болгария, Туркия, Қозоғистон ҳамда Ўзбекистондан жамоалар иштирок этди.

Мусобақа ишғол қилиш нарвонида ўқув минорасининг 4-қаватига кўтарилиш, 100 метрга тўсиқлар оша югуриш, ёнғин ўчирувчилар эстафетаси ҳамда ёнғин ўчириш бўйича жанговар ёйилиш турлари бўйича ўтказилди.

Ўзбекистон Республикаси Ички ишлар вазирлигининг Давлат ёнғин хавфсизлиги хизмати ходимларидан ташкил топган жамоа ишғол қилиш нарвонида ўқув минорасининг 4-қаватига кўтарилиш ва 100 метрга тўсиқлар оша югуриш бўйича олтинчи, ёнғин ўчирувчилар эстафетаси турида тўртинчи ҳамда ёнғин ўчириш бўйича жанговар ёйилиш турида тўққизинчи ўринларни эгаллади.

Шунингдек, ишғол қилиш нарвонида ўқув минорасининг 4-қаватига кўтарилиш турида 1 нафар ҳамда 100 метрга тўсиқлар оша югуриш турида 4 нафар терма жамоамиз спортчилари “Спорт устаси” меъёрларини бажаришди.

Ёнғин ўчирувчилар эстафетаси турида вакиллармиз 55.77 сония натижани қайд этиб, янги миллий рекордни ўрнатишди (олдингиси, 2014 йилда Қозоғистон Республикасида бўлиб ўтган Х-жаҳон чемпионатида 56.36 сония қайд этилган).

Умумжамоа ҳисобида биринчи ўринни Беларусь, иккинчи ўринни Россия ва учинчи ўринни Украина давлати вакиллари эгаллашди. Ўзбекистон Республикаси терма жамоаси эса кучли бешликка кирди. Ғолиб ва совриндорлар медаллар ва эсдалик совғалари билан тақдирландилар.