Пеп Гвардиола Ўзбекистондан қайтган Ҳусанов ҳақида фикр билдирди

"Унинг бунчалик кўп ўйин ўтказиши кутилмаганди, аммо бутун мавсум давомида ҳимоя чизиғимизда юзага келган вазият шуни тақозо этди. Унда ўзига хос фазилатлар бор, бу аниқ. Жуда, жуда ажралиб турадиган хусусиятларга эга; у ғоят чаққон, майдонда борини беради, баъзан юз ифодаси буни кўрсатмаса-да, кўплаб ҳаракатларида бутун эҳтиросини намоён этади...

Ва биз ундан қисқа вақт ичида, машғулотсиз ва бошқа кўп нарсаларсиз ҳам завқланмоқдамиз. У бизга катта ёрдам берди. Витор иккиси ҳали ёш, мавсум ўртасида мослашиш осон эмас, янги ўйинчилар, янги лига ва шунга ўхшаш нарсалар, аммо улар жуда яхши ҳолатда ва ниҳоятда ижобий кайфиятда.

Биз Абдуқодирни инглиз тилини машқ қилиш ва ўрганишга ундаймиз, чунки мулоқотга киришиш учун бу жуда муҳим", - деди Гвардиола. 

Эслатиб ўтамиз, "Борнмут" - "Манчестер Сити" учрашуви эртага, 30 март куни бизнинг вақт билан 20:30 да бошланади. Ўйин "Zo`r TV" телеканали орқали жонли эфирга узатилади.