President's Cup. Ҳумоюн Султонов 4-ракеткани мағлуб этди

Мукофот жамғармаси 40 минг АҚШ долларини ташкил этувчи мусобақада иккинчи ракеткамиз Ҳумоюн Султонов ҳам муваффақиятли одимлаяпти. Дунёнинг 550-ракеткаси бўлиб турган Султонов иккинчи давра учрашувида турнирнинг тўртинчи ракеткаси, қозоғистонлик Дмитрий Попкони мусобақадан чиқариб юборди. 

Таққослаш учун, мезбонлар вакили ATP рейтингининг 375-поғонасидан жой олган. Биринчи сет тай-брекда 6/7(4) ҳисобида Попко фойдасига ҳал бўлди. Иккинчи сетда Ҳумоюн тажрибали рақибига биронта ҳам гейм бермади - 6:0. Ҳал қилувчи учинчи сетнинг учинчи геймидан сўнг Дмитрий баҳсни давом эттира олмаслигини билдирди.

Шу тариқа, Султонов 1/4 финалга йўл олди. Эртага ҳамюртимиз ярим финал чиптаси учун россиялик Евгений Филипповга қарши кортга чиқади. Бу теннисчи рейтингда 649-поғонада бормоқда.