Қаршидаги футбол маҳорати мактабида байрам тадбири ўтказилди

Хусусан, Қарши шаҳридаги Қашқадарё вилояти футбол маҳорат мактабида ҳам 14 январь - Ватан ҳимоячилари кунига бағишланган байрам тадбири бўлиб ўтди.

Ёш авлодни ватанпарварлик ва фидойлик руҳида тарбиялаш, миллий армиямизга бўлган қизиқишларини ошириш мақсадида “Ким ватанга содиқ бўлса, мендурман ўша!” шиори остида ташкил этилган мазкур маънавий-маърифий тадбирда фахрийлар, ота-оналар, ўқувчи-ёшлар, кенг жамоатчилик иштирок этишди.

Дастлаб, байрам тадбирининг тантанали очилиш маросими ташкил этилди. Тадбирни футбол маҳорат мактаби директори, “Ўзбекистонда хизмат кўрсатган ёшлар мураббийи” Нурали Султонов табрик сўзи билан очиб, барчани ушбу қутлуғ сана билан табриклади.

Шунингдек, табрик учун сўз олган Қарши шаҳар мудофаа ишлари бўлими бошлиғи Бахтиёр Султонхўжаев, футбол маҳорати мактабининг маънавият ва маърифат ишлари бўйича директор ўринбосари Шавкат Рўзиевлар юртимиз тинчлиги ва чегараларимиз дахлсизлигини таъминлашда фидойи ҳарбийларимизнинг машаққатли меҳнатлари юксак эканлигини таъкидлаб ўтишди.

Шундан сўнг Қарши гарнизони маънавият ва маърифат маркази ҳарбий оркестри иштирокидаги Ватанни мадҳ этувчи куй-қўшиқлардан иборат концерт дастури тадбирига янада байрамона завқ-шавқ бағишлади.

Бир сўз билан айтганда, футбол маҳорати мактабида Ватан ҳимоячилари куни байрами кўтаринки руҳда ташкил этилди.

Илҳом РАҲМОНОВ тайёрлади