Қарши шаҳрида Олимпия кунига бағишланган спорт тадбири ўтказилди

Халқаро Олимпия кунига бағишланган байрам тадбирларининг узвий давоми сифатида жорий йилнинг 23 июнь куни Қарши шаҳрида кенг кўламли спортни тарғиб қилиш акцияси ташкил этилди.

Мазкур акция аҳоли, айниқса ёшлар ўртасида соғлом турмуш тарзини кенг тарғиб этиш, жисмоний фаолликни ошириш ҳамда Олимпия ҳаракатининг инсонпарварлик, дўстлик ва ҳамжиҳатлик каби юксак қадриятларини оммалаштириш мақсадида ўтказилди.

Акция иштирокчилари Қарши шаҳри бўйлаб спорт ва соғлом ҳаёт тарафдори эканликларини намойиш этдилар. Тадбир давомида турли ёшдаги фуқаролар, спортчилар, тренерлар, волонтёрлар ҳамда спорт ихлосмандлари фаол қатнашди.

Шунингдек, жамоат транспортлари, йирик савдо марказлари ва аҳоли гавжум ҳудудларда тарғибот тадбирлари ташкил этилиб, фуқароларга спортнинг инсон саломатлиги, ҳаёт сифати ва узоқ умр кўришдаги аҳамияти ҳақида батафсил маълумотлар берилди.

Акция доирасида иштирокчиларга Халқаро Олимпия кунига бағишланган эсдалик совғалари, махсус қўл тасмалари ва тарғибот материаллари топширилди. Сана муносабати билан турли спорт челленжлари ташкил этилиб, фаол қатнашчилар рағбатлантирилди.

Мазкур тадбирлар аҳолининг спортга бўлган қизиқишини янада ошириш, соғлом ва фаол ҳаёт тарзини оммалаштириш ҳамда Олимпия ҳаракатининг эзгу ғояларини кенг жамоатчилик орасида тарғиб этишга хизмат қилди.

Илҳом РАҲМОНОВ тайёрлади