Рико Верховен Деонтей Уайлдерга қарши жанг қилишга розилик берди

Аввалроқ нидерландиялик спортчининг рақиби WBC чемпиони Агит Кабайел ёки унинг ватандоши Алистар Оверим бўлиши мумкинлиги ҳақида хабарлар тарқалган эди, бироқ Верховен 11 декабрь кунги Кардиффдаги Тайсон Фьюри - Энтони Жошуа оқшомида Деонтей Уайлдерга қарши рингга чиқиши бўйича расмий таклиф олганини даъво қилмоқда.

"Усикка қарши жангдан сўнг биз кўплаб турли таклифлар олдик ва буни кўриш ёқимли эди. Биз шошилмадик, барча таклифлар ҳамда эҳтимолий рақибларни диққат билан ўрганиб чиқдик ва мен боксда қолишга қарор қилдим.

Бизга 11 декабрь кунги турнирда қатнашишни таклиф қилишди. Ҳозирча бу турнирда иштирок этишимни тасдиқлай олмайман, лекин менга Деонтей Уайлдерга қарши жанг таклиф қилингани ва мен бунга розилик берганимни тасдиқлай оламан. Табиийки, биз ҳали деталларни муҳокама қилишимиз керак. Ҳозир иккинчи томондан жавоб кутяпман. Агар улар ҳам рози бўлишса, жанг бўлиб ўтади", – дея Верховеннинг сўзларини келтиради talkSPORT.

Нидерландиялик спортчи билан учрашиш имконияти Уайлдерда Александр Усик билан жанг бўйича музокаралар барбод бўлганидан кейин пайдо бўлди. Украиналик боксчи америкаликка қарши ўз фаолиятидаги сўнгги жангини келгуси йилнинг март ойига режалаштирилгани тахмин қилинган эди, бироқ музокаралар берк кўчага кириб қолди.

Деонтей Уайлдер сўнгги жангини жорий йилнинг апрель ойида Лондондаги тадбирда ўтказиб, ҳакамларнинг бўлинган қарори билан британиялик Дерек Чисорани мағлуб этганди.

Рико Верховен профессионал боксда атиги иккита жанг ўтказганига қарамай, унинг сўнгги чиқиши ушбу тўқнашувда ғалаба қозонишига умид қилиши мумкинлигини кўрсатмоқда. Жорий йилнинг май ойида Мисрдаги Гиза пирамидалари яқинида сайёрамизнинг энг кучли кикбоксчисини ўн биринчи раундда баҳсли равишда тўхтатиб қолган Александр Усик нидерландиялик билан тўқнашувда мағлубиятдан зўрға қутулиб қолганди. Шундан сўнг у ўзига тегишли бўлган IBF, WBА ва WBC чемпионлик камарларидан воз кечишга қарор қилганди.