15 май 07:44
Янгиликлар

Теннис

Рим "Мастерс". Табило Жоковичдан кейин Хачановни ҳам мусобақадан чиқариб юборди

Италиянинг Рим шаҳрида ўтказилаётган "Мастерс" сериясига кирувчи нуфузли теннис турнири ўзининг ҳал қилувчи палласига кирди.

Бундан аввалги босқичда дунёнинг биринчи ракеткаси Новак Жоковични мусобақадан чиқариб юборган Алехандро Табило бу сафар ATP рейтингида 18-ўринни эгаллаб турган россиялик Карен Хачановдан устун келди. Рейтингнинг 32-поғонасидан жой олган чилилик теннисчи тажрибали Хачановни тай-брекларда таслим этди - 7/6(5), 7/6(10).

Табило бу ғалабаси эвазига теннисчиларнинг ўзаро учрашувларидаги мувозанатни тиклаб қўйди - 1:1. Икки соату 32 дақиқа давом этган баҳсда Алехандро 8, Карен 7 та эйс зарбани амалга оширди. Хачанов 1, Табило 2 та қўшхатога йўл қўйган. Иккала теннисчи ҳам 2 тадан брейкка эришган.