"Ролан Гаррос". 251 дақиқа давом этган Жокович - Циципас финал баҳси якунланди

Бироз аввал эркаклар ўртасидаги Франция Очиқ чемпионатининг ғолиби аниқланди. Ҳал қилувчи финал учрашувида сайёрамизнинг биринчи ракеткаси Новак Жокович ATP рейтингида бешинчи поғонадан жой олиб турган грециялик Стефанос Циципасга қарши кортга чиқди ва иродали ғалабани тантана қилди. 

Дастлабки икки сетни 6/7(6), 2/6 ҳисобларида бой берган сербиялик теннис юлдузи якунда ажойиб камбэкни амалга оширди ва кетма-кет учта сетни ўз фойдасига ҳал қилди - 6/3, 6/2, 6/4. Тўрт соату 11 дақиқа давом этган финалда 34 ёшли Жокович 5 та, 22 яшар Циципас эса 14 та эйс зарбасини амалга оширди. Теннисчиларнинг ўзаро учрашувларидаги ҳисоб Новак фойдасига йириклашди - 6:3.

Шу тариқа, Новак Жокович фаолиятидаги ўн тўққизинчи "Катта Дубулға" турнири бош совринини қўлга киритди. "Ролан Гаррос"даги муваффақиятли иштирок унга 2000 рейтинг очкоси ҳамда 1 миллион 400 минг евро мукофот пулини тақдим этди.