"Ролан Гаррос". Қозоғистонлик теннис маликаси 1/2 финал остонасида тўхтатилди

Аёллар ўртасидаги баҳсларда сайёрамизнинг тўртинчи рақамли теннис маликаси Елена Рибакина 1/4 финал босқичида ўз иштирокини тўхтатди. Қозоғистонлик теннисчи WTA рейтингининг 15-поғонасида бораётган италиялик Жасмине Паолинига уч сет натижасига кўра имкониятни бой бериб қўйди - 2/6, 6/4, 4/6.

Жасмине бу тарихий ғалабаси эвазига теннисчиларнинг ўзаро учрашувларидаги ҳисоб мувозанатини ҳам тиклаб қўйди - 2:2. Икки соату уч дақиқа давом этган баҳсда Рибакина 10, Паолини 1 та эйс зарбасини амалга оширган. Қўшхатолар Еленада кўпроқ бўлди - 3 га 1. Брейклар бўйича эса Жасмине устунлик қилди - 7 га 5. 

Италиялик теннис маликаси фаолиятида илк бор "Катта Дубулға" турнириларининг 1/2 финалига етиб келди. Бунгача унинг Франция Очиқ чемпионатидаги энг яхши натижаси иккинчи давра бўлган эди. Паолини фаолиятида учинчи бор Топ-5`даги рақибасидан устун келди. Энди у финал чиптаси учун ўзи сингари кашфиётга айланган россияликлик 17 ёшли Мирра Андреевага қарши кортга чиқади.