Себастьян Феттель мавсум охирида «Формула-1»даги фаолиятини якунлашини маълум қилди

«Охирги 15 йил давомида «Формула-1»да ажойиб инсонлар билан ишлаш шарафига муяссар бўлдим. Буларнинг барчаси учун уларга раҳмат айтмоқчиман. Мен сўнгги икки йил давомида «Астон Мартин» шарафини ҳимоя қилиб келяпман ва натижаларимиз биз кутгандек яхши бўлмасада, жамоа келгуси йилларда энг юқори савияда бўлишига ишонаман. 

Бундай ажойиб одамлар гуруҳи билан ишлаш менга ёқди. Лоуренс, Лэнс, Мартин, Майк, раҳбарлар, муҳандислар, механиклар ва жамоанинг қолган аъзолари - мен уларга энг яхши тилакларимни тилайман. Умид қиламанки, ўтган йили қилган ва бу йил давом эттираётган ишларим жамоа ривожига ёрдам беради. Қолган ўнта Гран-прида бор кучимни сарфлайман.

Кетиш қарори мен учун қийин бўлди, бу ҳақда кўп ўйладим. Йил охирида мен нимага эътибор қаратишим керак бўлса шунга кўпроқ вақт ажратмоқчиман. Мен ота сифатида оилам билан кўпроқ вақт ўтказишни хоҳлайман.

Лекин бугун мен хайрлашув ҳақида гапирмоқчи эмасман. Мен барчага, шу жумладан, қўллаб-қувватлашларсиз «Формула-1» бўла олмайдиган мухлисларга раҳмат айтмоқчиман», - дея Феттелнинг сўзларини келтиради «Астон Мартин» матбуот хизмати.

Эслатиб ўтамиз, Феттель тўрт марта жаҳон чемпиони бўлган. Ортда қолган 16 та «Формула-1» мавсумида 289 та стартда у 53 марта ғалаба қозонган ва 122 марта шоҳсупага кўтарилган.