Шаҳрам, Муроджон ва Исроил иштирокидаги бокс оқшоми тўғридан-тўғри намойиш этилади

Ушбу бокс оқшомининг биз учун аҳамиятли томони шундаки, унда уч нафар профессионал боксчимиз рингга кўтарилади. Улардан Исроил Мадримов проф рингдаги дебют жангини ўтказади. 

23 ёшли ҳамюртимизнинг рақиби мексикалик Владимир Эрнандес (10-2, 6КО) бўлади. Эрнандес 12та жанг ўтказиб, шуларнинг 10тасида ғалаба қозонган. Олтита жангда рақибларини нокаутга учратган. Икки бор ўзи мағлуб бўлган. Мадримов - Эрнандес жанги 10 раунддан иборат бўлади.

Ҳаваскор боксда жаҳон чемпиони Шаҳрам Ғиёсовга шу куни мексикалик чарм қўлқоп устаси Мигель Замудио рақиблик қилади. Шаҳрам 5 та жанг ўтказган ва уларнинг барчасида ғалаба қозонган. Тўртта баҳсни у муддатидан олдин якунлай олган. 27 ёшли Замудио эса профессионал боксда 53та жанг ўтказишга улгурган. Жангларнинг 41 тасида ғалаба қозонган (25 таси нокаут эвазига).

Олимпия ўйинлари ва жаҳон чемпионати совриндори Муроджон Аҳмадалиев эса Исаак Заратега қарши жанг ўтказади. Аҳмадалиев 10 раундга мўлжалланган жангда WBA Inter-Continental Super Bantamweight Title чемпионлик камарини ҳимоя қилади. 

Оқшомнинг марказий жангларидан бирида ярим оғир вазн тоифасида WBA йўналиши чемпиони россиялик Дмитрий Бивол собиқ жаҳон чемпиони франциялик Жан Паскалга қарши рингга кўтарилади. 

Ушбу бокс оқшоми Россиянинг Матч ТВ телеканали орқали тўғридан-тўғри трансляция қилинади. Ҳамютларимиз Россиянинг "Мир Бокса" промоутерлик компанияси билан шартнома имзолашганди.