Шумахер 2023 йилги Чемпионлар пойгасида иштирок этади

Мик жамоавий баҳсларда Себастьян Феттелнинг жамоадошига айланади ва улар биргаликда Германия шарафини ҳимоя қиладилар. Мик учун бу анъанавий Чемпионлар пойгасидаги учинчи иштирок бўлади. У 2019 ва 2022 йилларда ҳам мусоқада қатнашган.

Эслатиб ўтамиз, аввалроқ "Формула-2" чемпиони Фелипе Другович, "Формула-1"нинг собиқ пилоти Дэвид Култхард, WRC'нинг беш карра вице-чемпиони Тьерри Нёвиль, "Ле-Манн 24 соатлик пойга"сининг тўққиз карра ғолиби Том Кристенсен ва "IndyCar" ҳайдовчиси Феликс Розенквистларнинг пойгада қатнашиши маълум бўлган эди.

Бундан ташқари, иштирокчилар рўйхатидан тўрт карра жаҳон чемпиони Себастьян Феттель, "Формула-1" бўйича икки карра чемпион Мика Хаккинен, "Альфа Ромео" пилоти Валттери Боттас, ралли ҳайдовчилари Петтер ва Оливер Сольберг, Йохан Кристофферссон, шунингдек, "W Series "нинг икки карра чемпиони Жейми Чедвик ҳам бор.

Орзиқиб кутилаётган пойга 28-29 январь кунлари Швецияда бўлиб ўтади.