Сирдарёда “Вилоят ҳокими кубоги” мусобақаси бўлиб ўтди

Сирдарё вилояти ҳокимлиги, вилоят Спортни ривожлантириш бош бошқармаси, вилоят дзюдо федерацияси билан ҳамкорликда 1-октябрь – Ўқитувчи ва мураббийлар куни муносабати билан ташкил этилган “Вилоят ҳокими кубоги” мусобақасида вилоятнинг барча шаҳар ва туманларидан 200 нафарга яқин спортчи-ёшлар 10 та вазн тоифасида ғолиблик учун татамида беллашдилар.

Тантанали очилиш маросимида сўзга чиққан вилоят ҳокими Ғ.Мирзаев юртимизда муҳтарам Президентимиз бошчилигида жисмоний тарбия ва спортга берилаётган эътибор натижасида ёшларимизнинг халқаро спорт майдонларида оламшумул муваффақиятларга эришаётгани, биргина дзюдо спорти билан минглаб ўғил-қизлар шуғулланиб, юқори натижаларни қўлга киритаётганликларини, шунингдек, спортчиларни дунёнинг манаман деган спортчилари билан бемалол беллаша оладиган этиб тарбиялашда мураббийларнинг ўрни муҳимлигини таъкидлаб, устоз ва мураббийларни касб байрами билан алоҳида табриклади.

Қизғин ва муросасиз руҳда ўтган дзюдо баҳслари якунига кўра, умумжамоа ҳисобида 1-ўрин Сайхунобод тумани, 2-ўрин Гулистон шаҳри ва 3-ўрин Гулистон тумани спортчиларига насиб этди. Ғолиб ва совриндорларга медал, диплом, кубок ва пул мукофотлари тақдим этилди.