14 дек 10:20
Янгиликлар

Бокс/ММА

Собиқ UFC чемпиони 40 ёшли Крис Сайборг PFL камарини қўлга киритди

Франциянинг Лион шаҳрида ўтган PFL турнирининг яна бир қизиқарли чемпионлик жанги аёллар ярим енгил вазн тоифасида ташкил этилди.

Оқшомнинг ушбу co-main event жангида бразилиялик ММА фахрийси, собиқ UFC, Bellator, Strikeforce ва Invicta FC промоушенлари чемпиони Крис Сайборг австралиялик рақибаси Сара Коллинзга қарши октагонга чиқди. Жангнинг учинчи раундида тажрибали Сайборг Сарани бўғиш усули билан таслим этди.

Шу тариқа, 40 яшар Крис ярим енгил вазн тоифасида вакант, яъни эгасиз бўлиб турган PFL чемпионлик камарини қўлга киритди. Сайборгнинг ММАдаги ғалабалари 29 тага етди. Ғалабаларидан 23 тасига муддатидан аввал эришган. Ҳисобида 2 та мағлубият ҳам бор. Унинг иштирокидаги яна битта жанг натижаси эса эълон қилинмаган.

Таққослаш учун, 35 ёшли Сара Коллинз эса фаолиятидаги илк мағлубиятини қабул қилиб олди. У бунгача олтита ғалабали серия билан келаётганди.