Спорт курашлари. Юнон-рум курашчиларимиз бронза медали ва лицензия учун имкониятларини сақлаб қолди

Бугун умумий ҳисобда 5 нафар спортчимиз гиламга чиқди.

Дастлаб, аёллар кураши доирасида -62 кг вазнда Ариухан Жумабаева илк ўтиш баҳсида болгариялик Бильяна Дудова билан жанг қилиб, 0:11 ҳисобида имкониятни бой берди.

Юнон-рум курашчиларимиздан Жасурбек Ортиқбоев (55 кг) ярим финалга қадар етиб борди. У финал йўлида грузиялик Нугзари Сурсумияга мағлуб бўлди - 4:7. Ортиқбоев эртага бронза медали учун гиламга чиқади.

77 кг вазн тоифасидаги вакилимиз Арам Варданьян эса чорак финалга қадар етиб борди. Қирғизистонлик Акжол Маҳмудовга қарши кечган чорак финал баҳсида 0:6 ҳисобида имкониятни бой бериб қўйди. Арам ҳам эртага бронза медали ва Париж-2024 ёзги Олимпиада лицензияси учун гиламга чиқиш ҳуқуқини сақлаб қолди.

Муҳаммадқодир Расулов (82 кг) эса илк босқичда Финландия вакили Артьём Шаповаловдан 8:0 ҳисобида устун келди. Нимчорак финалда эса спортчимиз туркиялик Бурхан Акбудакга мағлуб бўлди ва мусобақани якунлади.

Энг оғир вазндаги спортчимиз Темурбек Насимов (130 кг) эса илк босқичдаёқ кореялик Ли Сьёнг Чанга мағлуб бўлиб, жаҳон чемпионатини тарк этди.

Шундай қилиб, бугун гиламга чиқган икки нафар спортчимиз бронза медали ва Олимпиада лицензияси учун курашиш ҳуқуқини сақлаб қолди.