Super Rizin 5 натижалари: Шайдуллаев Rizin ва PFL чемпионлик камарларини бирлаштирди

Шайдуллаев ярим енгил вазн тоифасидаги Rizin чемпионлик камарини муваффақиятли ҳимоя қилди ва шу вазн тоифасидаги вакант бўлган PFL чемпионлик унвонини қўлга киритди. У Осака шаҳрида ўтказилган Super Rizin 5 турнирининг марказий жангида америкалик Эй Жей МакКини мағлубиятга учратди.

Жанг тўлиқ уч раунд давом этди ва ҳакамларнинг якдил қарори билан (учала ҳакам ҳам 30-27 ҳисобини берди) 25 ёшли қирғизистонлик спортчи фойдасига ҳал бўлди. Шайдуллаев фаолиятида илк бор рақибини муддатидан олдин таслим эта олмади, бироқ кураш ва грепплингдаги устунлиги эвазига бутун жанг давомида ташаббусни ўз қўлида ушлаб турди.

Ғалабадан сўнг, Ражабали Шайдуллаев ўзининг навбатдаги рақиби бўлиши кутилаётган 20 ёшли япониялик иқтидорли жангчи Киёма Акимото билан "кўз уриштириш" (face to face) маросимини ўтказди. Дастлабки маълумотларга кўра, чемпионлик жанги декабрь ойига режалаштирилган ва у ташкилотнинг анъанавий янги йил турнирининг марказий жанги бўлиши мумкин.

Турнирнинг барча натижалари:

Ражабали Шайдуллаев Эй Жей МакКини ҳакамларнинг якдил қарори билан мағлуб этди (30-27, 30-27, 30-27) – ярим енгил вазнда Rizin ва PFL чемпионлик камарлари учун жанг.

Микуру Асакура Шиня Аокини нокаут билан мағлуб этди (зарбалар) – 1-раунд, 2:39.

Рен Хирамото Қаршиға Даутбекни ҳакамларнинг айри қарори билан мағлуб этди (27-29, 29-28, 29-28).

Роберто Сатоши де Соуза Шунта Номурани ҳакамларнинг якдил қарори билан мағлуб этди (29-28, 29-28, 29-28).

Ютака Сейто Рен Сугиямани ҳакамларнинг якдил қарори билан мағлуб этди (30-27, 30-27, 30-27).

Вугар Карамов Рио Такагини ҳакамларнинг якдил қарори билан мағлуб этди (29-28, 30-27, 30-27).

Наталья Кузютина Рина Куботани сабмишн (гильотина бўғиши) билан мағлуб этди – 2-раунд, 3:14.