Сурхондарё вилояти дзюдосида ўрганиш ишлари бошланди

Хабарингиз бор, ўтган ойда Тўлқин Валиев Ўзбекистон дзюдо федерациясининг Сурхондарё вилояти бўлимига раис этиб тайинланган эди. Янги раҳбар сафар давомида Азизжон Камиловга ҳамроҳлик қиляпти. Сафарнинг илк манзили Жарқўрғон тумани бўлди.  

Бугунги кунда Жарқўрғон тумани спорт мактаби дзюдо бўлимида 100 нафарга яқин болалар олимпия оиласига мансуб ушбу яккакураш тури билан шуғулланиб келмоқда. Уларга мураббийлардан Ўрол Ортиқов, Ғайрат Чоршанбиев ва Нуриддин Ортиқов дзюдо сир-асрорларини ўргатишяпти. 

Федерация раиси мактабдаги болалар учун яратилган шароитлар билан танишди, ёш дзюдочилар билан суҳбатлашди. Уларга Сурхондарё вилоятидан етишиб чиққан Олимпия ўйинлари совриндорлари, жаҳон чемпионлари Абдулла Тангриев, Шарофиддин Лутфуллаев, Музаффарбек Тўрабоев сингари дзюдочиларни ўрнак сифатида кўрсатди.