Деновдаги кураш мусобақасида таниқли полвон пичоқлаб ўлдирилди

Бу ҳақда Kun.uz манбаси хабар берди. Майдонда миллий кураш бўйича маҳаллий мусобақа ўтказилган.

Мусобақада Низомиддин полвоннинг ўғли Аюбхон Хуррамов рақиби Бўстонбек Жабборов устидан ғалаба қозонган. Укасининг мағлубиятидан ғазабланган Достон Жабборов эса Низомиддин полвоннинг орқа томонидан келиб, бир неча бор унга пичоқ билан зарба берган. Бунинг натижасида оғир жароҳатлар олган Низомиддин Чўтбоев зудлик билан туман тиббиёт бирлашмасига олиб борилганига қарамай, жонлантириш бўлимида вафот этган.

Суд-тиббий экспертизасининг дастлабки хулосасига кўра, марҳумнинг танасига тўрт маротаба оғир пичоқ зарбаси берилган. Кўкрак қафаси, бел ва думба соҳаларига етказилган жароҳатлар ички органларни тешиб ўтган ва ҳаёт учун хавфли бўлган оғир тан жароҳати сифатида баҳоланган.

Мазкур ҳолат юзасидан шу куннинг ўзида Денов туман прокуратураси томонидан Достон Жабборовга нисбатан Жиноят кодексининг 97-моддаси 2-қисми «л» банди (безорилик оқибатида қасддан одам ўлдириш) билан жиноят иши қўзғатилган. Гумонланувчи ЖПКнинг 221-моддаси тартибида ушланган. Ҳозирда туман прокуратураси томонидан дастлабки тергов ҳаракатлари олиб борилмоқда.

Kun.uz нашри манбасига кўра, Достон Жабборов муқаддам судланган бўлиб, зўравонлиги билан танилган шахс ҳисобланади.