РАСМАН: Тошкент 2026 йилда дзюдо бўйича жаҳон чемпионатига мезбонлик қилади!

Ҳужжат Халқаро дзюдо федерацияси (IJF) президенти Мариус Визер ва Ўзбекистон дзюдо федерацияси раиси Азизжон Камилов томонидан имзоланди.

Турнирни Иорданиядан Ўзбекистонга кўчириш тўғрисидаги қарор мамлакатимизнинг юқори халқаро нуфузининг тасдиғи бўлди. Бундай нуфузли мусобақаларнинг Тошкентда ўтказилиши давлатимиз раҳбарининг шахсан спортни ривожлантиришга қаратаётган эътибори ва ёшларни қўллаб-қувватлаш борасидаги кенг кўламли ислоҳотларнинг жаҳон ҳамжамияти томонидан эътироф этилишидир.

Азизжон Камилов бошчилигидаги Федерациянинг тизимли фаолияти ва 2022 йили катталар ўртасидаги Жаҳон чемпионатини муваффақиятли ўтказиш тажрибаси туфайли Халқаро дзюдо федерацияси (IJF) Ўзбекистонни хавфсизлик ва мукаммал ташкил этишни кафолатлайдиган энг ишончли ҳамкор сифатида танлади.

Жаҳон чемпионати 2026 йилнинг 19-22 ноябрь кунлари бўлиб ўтади. Турнир Янги Ўзбекистоннинг спорт салоҳиятини намойиш этиш учун муҳим майдон ва спортчиларимизнинг келажакдаги Олимпия ғалабалари учун кучли рағбат бўлади.