Тавсия қиламиз! Жокович тарихдаги энг буюк теннисчи. Янги далиллар билан

Ва унинг фойдасига ишлайдиган кўрсаткичлар тобора кўпайиб бормоқда.

“Ролан Гаррос”да ғалаба қозонганидан сўнг, у «Очиқ эра»да (1968 йилдан бери, профессионаллар «Катта Дубулға» да ўйнашга рухсат берилгандан кейин) барча “Улкан Тож” мусобақаларида камида икки марта ғолиб чиққан илк теннисчига айланди. У Austrlian Open`да тўққиз марта, Уимблдонда беш марта, US Open`да уч бор ва "Ролан Гаррос"да икки маротаба чемпионликни тантана қилган.

Умуман эркаклар теннисининг тарихига назар солинса, Рой Эмерсон ва Род Лавер барча “Катта Дубулға” турнирларини икки мартадан ютишган.

Ҳозирда Жоковичда жами “Катта Дубулға”даги 19 унвон бор ва у Рожер Федерер ва Рафаэль Надальдан атиги битта унвон ортда. У бошқа ҳеч қандай унвонни ютмаслигини тасаввур қилиш жуда қийин. Деярли имконсиз. Эҳтимол, рекорд у билан қолар.

Бу йил сербиялик теннисчи Федерерга тегишли бўлган рейтингнинг биринчи қаторидаги ҳафталар сони бўйича рекордини янгилади (Жоковичда 324, Федерерда эса 310 ҳафта ). Ва камида "Уимблдон" охиригача ҳеч ким уни биринчи ўриндан тушириб юборолмайди.

Ўтган йили Новак Пит Сампраснинг рекордини янгилаб, мавсумни олтинчи марта 1-рақамли теннисчи бўлиб якунлади.                                                                       

2019 йилда Жокович тўққизта “Мастерс” турнири ғолибига айланди. Ўтган йили у бу натижани янада яхшилади. У Цинциннати турнирида иккинчи марта чемпионликни қўлга киритди ва барча “Мастерс” турнирларини икки мартадан ютган биринчи теннисчи бўлди. Тўғри, Цинциннати ўтган йили Нью-Йоркда бўлиб ўтган, аммо бу ҳақиқатан ҳам тарих учун муҳимми?

Ва “Ролан Гаррос”да ғалаба қозонганидан сўнг, Жокович 60 та асосий унвонга эга бўлди (Дубулғалар, Мастерслар...). Бу кўрсаткич Надальда 57, Федерерда 54 та.

”Ролан Гаррос” финалида Жокович Циципасга қарши ТОП-10 теннисчи устидан 222-ғалабасини қўлга киритди. Шубҳа йўқки, Жокович яқин йилларда Федерерга қараганда ўнлаб учрашувларда кўпроқ ғалаба қозонади.

Гап “Катта Учлик”даги рақобатчилар ҳақида кетар экан, Жокович ҳанузгача иккаласи билан ўйинларда ғалаба қозониш бўйича ҳам пешқадам. Федерерга қарши ўйинлардаги ҳисоб - 27:23. Надальга қарши эса - 30:28.

Надаль “Ролан Гаррос”даги ўйинида ҳисобни тенглаштириши мумкин эди, аммо унинг ўрнига Жокович ўзини энг зўр қилиш учун яна бир натижани қўшиб қўйди. 

Надаль ўзининг энг севимли мусобақасида Новакга ютқазаётган бўлса, Федерер Уимблдонда 3:1 ҳисобида олдинда бормоқда. Тўғри, барча ғалабалар Федерер 30 ёшга тўлгандан кейин қўлга киритилди.

Айтганча, 30 ёшга тўлганидан кейин Жокович еттинчи “Катта Дубулға”ни қўлга киритди. Бу ҳам рекорддир. Надальда олтита, Федерерда тўртта.

XXI асрда фақат икки маротаба битта теннисчи мавсумнинг дастлабки иккита “Улкан Тож” турнирини қўлга киритган - иккала сафар ҳам бу теннисчи  Жокович эди. Шундай қилиб, энди у “Катта Дубулға” тақвимини тўлиқ ўзлаштириш учун ҳақиқий имкониятга эга. Агар у буни расмийлаштирса, унда энг катта тортишувлар аниқ ёпилиши мумкин.

Хорижий сайт асосида Хуршида Абикулова тайёрлади