Жавоҳир Синдаров - Жаҳон кубоги ғолиби!

Ушбу нуфузли мусобақада дунёнинг турли мамлакатларидан 200 нафардан ортиқ шахматчи бош соврин учун кураш олиб борди. 

Ҳамюртимиз Жавоҳир Синдаров беллашувларнинг финалига қадар етиб келди. Ҳал қилувчи баҳсда Синдаровга хитойлик Вей Йи рақиблик қилди. 

Мазкур қарама-қаршиликнинг дастлабки икки партияси дуранг билан якунланганди. Якунда бугун ғолиб тай-брэйкда аниқланди. 

Тай-брэйк якунига кўра, Жавоҳир Синдаров 1,5 : 0,5 ҳисобларида ғалаба қозонди ва Жаҳон кубоги ғолибига айланди. 

Маълумот учун, Жавоҳир Синдаров мазкур мусобақа давомида Никита Петров (Черногория), Николас Теодору (Греция), Ю Янгйи (Хитой), Фредрик Сване (Германия), Хосе Мартинес Алькантара (Мексика), Нодирбек Якуббоев (Ўзбекистон) каби шахматчиларни енгиб, финалга қадар етиб келди. 

Ушбу муваффақият орқали Жавоҳир Синдаров 120 минг АҚШ долларига эга бўлди. 

Энди ҳамюртимиз келаси йили март ойида Кипрда ўтказиладиган номзодлар турнирида иштирок этади.