Тимофеева илк WTA турниридаёқ финалгача чиқди

Россиялик теннисчи Венгрия пойтахти Будапешт шаҳрида ўтказилаётган турнириниг ярим финал учрашувида дунёнинг 80-ракеткаси, аргентиналик Надя Подорошкани 7/6(6), 3/6, 6/3 ҳисобида мағлубиятга учратди. 

Бу теннисчиларнинг ўзаро ўтказган илк учрашуви эди. Уч соату 14 дақиқа давом этган баҳсда Тимофеева эйс зарбасини ижро эта олмади. Рақибасида бу кўрсаткич 4 тани ташкил қилди. Иккала теннисчи ҳам 7 тадан брейкни амалга оширган. 

Эътиборга молик жиҳати шундаки, 19 ёшли Тимофеева имтиёзли йўлланма асосида асосий тўрга қўшилган эди. Бу унинг фаолиятидаги илк WTA турнири ҳисобланади. Финалдаги натижадан қатъий назар, у эртага эълон қилинадиган WTA рейтингида Топ-150`таликда дебют қилади. Бугун у бош соврин учун украиналик Катерина Байндлга қарши кортга чиқади.