Тони Фергюсон чемпионлик камарини собиқ футболчидан ҳимоя қилади

"Misfits Boxing" ташкилотининг ўрта вазн тоифасидаги чемпиони 26 сентябрь куни Майамида бўлиб ўтадиган турнирда ўз чемпионлик камарини ҳимоя қилади. Унинг рақиби нидерландиялик собиқ футболчи Кензо Бийонг бўлади.

Футболчилик фаолиятини жуда эрта якунлаган Кензо кейинчалик юнон-рум кураши билан шуғуллана бошлаган. У қисқа фурсатда Нидерландия чемпиони бўлиб, миллий терма жамоага қадар етиб борган. Кейинчалик эса жиу-житсу билан шуғулланган. Жорий йилнинг апрель ойида 28 ёшли Бийонг "UFC BJJ" лигасида 65,8 кг вазн тоифасида дебют қилиб, биринчи раунддаёқ Рафаэль Феррейрадан бўғиш усули эвазига мағлубиятга учраган эди.

42 ёшли Тони Фергюсон 2025 йилнинг август ойида блогер Натаниел "Salt Papi" Бустамантени учинчи раундда техник нокаут эвазига мағлуб этиб, "Misfits Boxing"нинг ўрта вазндаги вақтинчалик чемпионлик камарини қўлга киритган эди. Ўтган йилнинг декабрь ойида эса аралаш яккакурашлар фахрийси Дубайдаги "Misfits Mania" турнирида Уоррен Спенсерни ҳакамларнинг якдил қарори билан мағлуб этиб, мутлақ чемпион мақомига кўтарилган эди.