Тони Фергюсон олтинчи мағлубиятидан кейин "тилга кирди"

Бу америкалик тажрибали жангчининг UFC октагонида кетма-кет қабул қилиб олган олтинчи мағлубияти бўлди. 

"Мен кеча октагонга бутун дунёга ҳали ҳамон мавжуд эканимни исботлаш учун чиқдим. Бу жангга ўзгача тарзда тайёргарлик кўрдим. Машғулот лагерим ҳам аввалгиларидан кескин тарзда фарқ қилди. Фаолиятимдаги энг яхши тайёргарлик жараёнини ўтказдим деб бемалол айта оламан. 

Жанг бошланган пайтда ўзимни ҳотиржам ва ишончли сездим. Бобби кўзимга қўлини суқиб олишига қадар ҳаммаси режа асосида кетаётганди. У бу ишни атайин қилди деб ўйлайман. Бобби аввалги жангларида ҳам рақибларига шундай ҳунар кўрсатганди. Бу ҳолат кўриш ҳолатимни пасайтирмай қолмади. Мўлжални аниқ олишда қийинчиликка дуч кела бошладим. Шунга қарамай, жангни давом эттиришдан бош тортиш ҳақида ўйламадим. Ваҳоланки, шифокор мендан бир неча бор жангни давом эттирмаслигимни сўради. 

Фаолиятим давомида ҳар қандай қийинчиликни енгиб ўтишга интилганман. Бу сафар ҳам шундай бўлди. Афсуски, спортда ҳар доим ҳам сен ўйлаган нарсалар бўлавермайди. Омадсизликлар спортнинг ажралмас бўлаги. Кўзимга бармоғи кириб кетганини мағлубиятимга баҳона сифатида ҳам келтирмайман. Олдинга интилишда давом этаман. 

Фаолиятимни якунлаш ниятидан йироқман. Дана Уайт, Хантер Кэмпбелл ва жамоам билан ҳамкорлигимни давом эттираман. Мухлисларим, оила аъзоларимга катта раҳмат. Уларнинг қўллаб-қувватлаши мени олға қадам босишга ундайди. Эртага офтальмолог ҳузурига бораман ва кўзимнинг ҳолатини текширувдан ўтказаман. Кейин эса тиббий хулосага қараб режаларимни тузиб оламан", - деди Фергюсон.