Тошкент “Катта дубулға” турнири олдидан матбуот анжумани ўтказилди

Париж-2024 ёзги Олимпия ўйинларига йирик рейтинг очколарини тақдим этувчи ушбу мусобақага 70 дан ортиқ мамлакатдан 500 нафардан зиёд спортчи ташриф буюриши кутилмоқда. Бугун МОҚда мазкур турнирга бағишланган матбуот анжумани ташкил этилиб, беллашувлар олдидан қатор мавзулар муҳокама қилинди.

Тадбирда Спорт вазирлиги, Миллий Олимпия қўмитаси, Ўзбекистон дзюдо федерацияси раҳбарияти, Халқаро дзюдо федерацияси (IJF) медиа бўлими мутахассислари, терма жамоа мураббийлар штаби ва ОАВ ходимлари иштирок этишди.

Анжуман аввалида Спорт вазирининг ўринбосари Шаҳрулло Маҳмудов мусобақани юқори савияда ўтказиш учун давлатимиз томонидан катта эътибор қаратилаётгани, барча иштирокчилар учун қулай шароитлар яратиб берилиши ҳақида гапирди. Ўз навбатида, МОҚ Бош котиби Ойбек Касимов Париж-2024 ёзги Олимпия ўйинларига умумий кўрилаётган тайёргарлик, дзюдочиларимиздан кутилаётган натижалар борасида сўзлаб берди. МОҚ раиси ўринбосари, мамлакат дзюдо федерацияси раиси Азизжон Камилов терма жамоа аъзоларининг тайёргарлиги, мамлакатимизда ёшлар ўртасида дзюдо оммавийлигини ошириш борасида амалга оширилаётган ишлар, федерациянинг яқин режалари хусусида тўхталди.

Анжуман давомида ОАВ ходимлари терма жамоа аъзоларининг тайёргарлиги, мусобақада қатнашадиган таркиб ва бошқа қизиқарли мавзулардаги саволлар билан мутахассисларга юзланишди. Бунга жавобан терма жамоа бош мураббийи Илиас Илиадис, аёллар жамоаси устози Жамшид Худойберганов спортчиларнинг умумий ҳолати яхши экани, йил бошида кетма-кет икки турнирда ғалаба қозонган Диёра Келдиёровага дам берилгани ва бошқа йўналишлар бўйича маълумот беришди.