Туркияда Халқаро Кураш Ассоциациясининг 17-Конгресси бўлиб ўтди

Pullman Convention Center меҳмонхонасида ўтган Конгрессда Осиё, Африка, Европа ҳамда Жанубий Америка қитъаларидан ташриф буюрган 50дан зиёда давлат вакиллари иштирок этишди. Конгрессга Халқаро Кураш Ассоциацияси (IKA) президенти Хайдар Фармон раҳбарлик қилди.

Конгресснинг биринчи қисмида 11-жаҳон чемпионати мезбони Истамбул шаҳрининг Бехчиэвлер муниципалитети мэри Осман Девелиоглу ташкилий масалалар, жаҳон чемпионатига тайёргарлик ва уни ўтказиш бўйича ҳисобот берди.

Шундан сўнг бир қатор ташкилий масалалар кўриб чиқилди. Кураш нуфузини жаҳон спорт ҳамжамиятида янги босқичга кўтариш, барча қитъаларда турли даражадаги мусобақаларни ўтказишга алоҳида урғу қаратилди.

Бундан ташқари, Африка, Осиё ва Океания, Европа ва Америка қитъалари раҳбарлари ўз қитъалари бўйича амалга оширилаётган ислоҳотлар, ўтказилаётган мусобақалар юзасидан ҳисобот беришди.