Уайт Стриклендга жавоб қайтарди: "У яқинда янги шартнома имзолади"

Стрикленд лига ҳатто ўз юлдузлари ва чемпионларига ҳам жуда кам пул тўлашини ва улар ўз вақтида кетишга имкон топа олмасликларини даъво қилган эди.

"Йўқ, мен у билан шахсан гаплашдим. Ижтимоий тармоқларда кўрганларим эса... Шон Стрикленд ҳеч қачон бирор нарсадан норози бўлмаган ёки айтишга гапи бўлмаган?", — деди Уайт ўзининг саралаш турниридан кейинги матбуот анжуманида.

"Шон Стрикленд май ойида янги шартнома имзолаган, — дея қўшимча қилди Уайт, шу билан шартлар яхшилангани ва у бунга рози бўлганини назарда тутиб. — Бу тўрт-беш ой олдин бўлган. У айтаётган рақамлар ҳақиқатга тўғри келмайди. Агар у бир ёки икки йил давомида ўша эски шартлар асосида жанг қилганида эди бу бошқа гап бўларди. Лекин у май ойида шартнома имзолади. Вазият шундай".

Стрикленд, шунингдек, аралаш яккакурашлар (ММА) бўйича машғулотларни ташлаганини ва бокс бўйича жанг ўтказмоқчи эканлигини маълум қилди. Масалан, у катта пул эвазига "Zuffa Boxing" промоутерлик компаниясида жанг қилмоқчи.

Бироқ, амалдаги шартнома туфайли у буни фақат UFC рухсати билан амалга ошириши мумкин. Уайт эса Стрикленднинг бокс рингидаги имкониятларига нисбатан шубҳа билан муносабат билдирди.