UFC Baku. Нурсултон Рўзибоев бонус қўлга киритмади, лекин гонораридан ташқари қўшимча яхшигина пулга эга чиқадиган бўлди

Мусобақада ўзбекистонлик аралаш якка кураш устаси Нурсултон Рўзибоев Россия вакили Андрей Пуляевга қарши баҳс олиб бориб, биринчи раундда сабмишен орқали муддатидан аввал зафар қучди.

Ташкилотчилар 100 минг АҚШ доллари миқдоридаги бонус пуллари қайси жангчиларга ажратилишини маълум қилди. Унга кўра, озарбайжонлик Рафаэль Физиев, қозоғистонлик Асу Алмабаев, Туркия вакили Абдул-Раҳман Яхёев ҳамда украиналик Даниил Донченко UFC'нинг кафолатланган гонорардан ташқари, 100 минг АҚШ доллари миқдорида бонусига эга чиқди.

Бироқ, турнирда муддатидан аввал ғалаба қозонган, вазн ўлчаш маросимидан муаммосиз ўтган барча жангчиларга яна қўшимча 25 минг доллар бонус тўланадиган бўлди. Бу ҳолатда ўз жангини муддатидан аввал якунлаган Нурсултон Рўзибоев ҳам қўшимча бонусни қўлга киритди.