UFC чемпиони Кайла Харрисоннинг фалаж бўлиб қолишига бир баҳя қолди

Унга шифокорлар бўйнидаги шошилинч жарроҳлик амалиётидан воз кечишнинг аянчли оқибатларини тасвирлаб берганидан сўнг, Аманда Нуньесга қарши чемпионлик жангидан воз кечганди.

Бу ҳақда Submission радиосига берган интервьюсида америкалик чемпионнинг менежери Али Абдел-Азиз маълум қилди.

"У ҳатто қўлини ҳам кўтара олмади. Унга укол қилишди, яллиғланишга қарши бир дунё дори беришди - ҳеч нарса ёрдам бермади. UFC уни Нью-Йоркка жўнатди ва шифокорлар унга дарҳол операция қилиш кераклиги, акс ҳолда шол бўлиб қолиши мумкинлигини айтишди", - деди Абдел-Азиз.

Шунингдек, Абдел-Азизнинг сўзларига кўра, Харрисонни жарроҳлик столига ётишига мажбур қилган бўйин жароҳати дзюдо бўйича икки карра Олимпия чемпиони кўп йиллардан бери курашаётган сурункали муаммо ҳисобланади.

Эслатиб ўтамиз, чемпион Харрисон ва даъвогар Нуньес ўртасидаги чемпионлик жанги 25 январь куни тонг саҳарда Лас-Вегасда ўтадиган UFC 324 турнирининг co-main event тўқнашуви бўлиши керак эди.