UFC Fight Night 271. Нокаутлар оқшомининг бонус соҳиблари маълум

Аёллар ўртасида энг енгил вазн тоифасида собиқ UFC чемпиони Алекс Грассо Мейси Барбер билан тўқнашувда фаолиятидаги энг томошабоп ғалабалардан бирини қўлга киритиб, UFC Fight Night 271 турнирининг бонус соҳиблари сафидан жой олди. 

Биринчи раунднинг ўрталарида мексикалик Грассо америкалик рақибасини чап томондан берилган зарба эвазига мувозанатдан чиқарди ва деярли ҳушини йўқотган Барберни бўғиш усули билан таслим этди. Бунинг эвазига у 100 минг долларлик чекни қўлга киритди.

Тадбирнинг асосий воқеасида собиқ дивизион чемпиони Исраэль Адесаньяни иккинчи раундда техник нокаут эвазига мағлубиятга учратган америкалик ўрта вазн тоифаси вакили Жо Пайфер иккинчи бонусга эга бўлди. 

Енгил вазн тоифаси вакиллари озарбайжонлик Тофик Мусаев ҳамда Игнасио Бахамондес ўртасидаги қонли тўқнашув UFC Fight Night 271 турнирининг энг яхши жанги деб топилди. Прелим кардни ёпиб берган ушбу жангда Мусаев рақибини очколар ҳисобига кўра енгди. Иккинчи раундда у нокдаун ҳолатига тушиб қолганига қарамай, якунда ғалабани илиб кетди. Ҳар икки жангчи 100 000 доллардан мукофот пули олишди. 

Шунингдек, ўз жангларини муддатидан олдин ғалаба билан якунлаган Майкл Кьеса, Леррьян Дуглас, Юсри Белгаруи, Терренс МакКинни, кичик Лэнс Гибсон, Кейси О'Нилл ва Навахо Стирлинг 25 000 долларлик бонусни қўлга киритди.