UFC Парижга қайтиш санаси расман эълон қилинди

Франция пойтахтидаги турнир 5 сентябрь куни бўлиб ўтади. 2022 йилдан бери ташкилот ҳар йили сентябрь ойида Франция пойтахтида мусобақа ташкил этади ва унга 15 мингдан зиёд томошабин келади. Сўнгги тадбир Париждаги барча UFC турнирлари орасида томошабинлар сони бўйича рекорд ўрнатган, ўшанда 16 мингга яқин мухлис Нассурдин Имамов ва Кайо Борральо ўртасидаги оқшомнинг асосий жангини томоша қилиш учун келганди. Ўша жангда Франция шарафини ҳимоя қилаётган доғистонлик аралаш яккакураш устаси ҳакамларнинг якдил қарори билан ғалаба қозонган эди.

Франциялик жангчилар Парижда ўтган турнирларнинг асосий жангларида уч маротаба зафар қучишган. Фақат битта жангда мағлубият қабул қилиб олинган. Бу 2024 йилда Ренато Мойканога муддатидан олдин мағлуб бўлган Бенуа Сен-Дени эди. Ўтган йили Сен-Дени мағлубиятини ғалаба билан ёпиб кетди. У Маурисио Руффини очколар ҳисобига кўра таслим этди. 

Париждаги тўртта UFC турниридан иккитасининг асосий жанги Сирил Ган иштирокида кечган. Оғир вазн тоифаси вакили бу жангларда Сергей Спивак ва Тай Туивасни нокаут эвазига мағлуб этганди. Сирил шу дам олиш куни Оқ уй яқинидаги турнирда оғир вазн тоифасида вақтинчалик UFC чемпиони унвони учун Алекс Перейрага қарши октагонга чиқади.