"Уимблдон". Эркаклар ўртасидаги финал баҳси бўлиб ўтди + ФОТО

Ҳал қилувчи финал учрашувида сайёрамизнинг биринчи ракеткаси, сербиялик Новак Жокович ҳамда ATP рейтингининг 9-поғонасидан жой олиб турган италиялик Маттео Берреттини ўзаро тўқнаш келишди. Уч соату 23 дақиқа давом этган баҳсда тажриба ўз сўзини айтди ва Новак 6/7(4), 6/4, 6/4, 6/3 ҳисобларида ғалаба қозонди.

Новак учрашув давомида 5 та, Маттео эса 16 та эйс зарбасини амалга оширди. Теннисчиларнинг ўзаро учрашувларида Жокович ҳисобни йириклаштирди - 3:0. 

Шу тариқа, Новак Жокович фаолиятидаги йигирманчи "Катта Дубулға" турнири бош совринини қўлга киритди. Ютиб олинган умумий совринлари эса 85 тага етди. Новак "Уимблдон" турниридаги бу йилги иштирокидан 2000 рейтинг очкоси ҳамда 1 миллион 700 минг фунт стерлинг мукофот пули ишлаб олди. Берреттини эса 1200 очко ва £900,000 фунтга эга бўлди. 

Сербиялик теннисчи турнир якунларига кўра дунёнинг биринчи ракеткаси бўлиб қолади. У иккинчи ўринда бораётган россиялик Даниил Медведевни 1743 очкога ортда қолдиряпти. Берреттини эса Рожер Федерерни ортда қолдириб, 8-ўринга кўтарилиб олади. 

Жоковичнинг фаолиятида ишлаб топган пуллари 152,1 миллион доллардан ошди. Бу теннис тарихидаги рекорд натижадир. Айнан Новак биринчи бўлиб 150 миллионлик довонни забт этганди.