"Uzchess Cup". Пешқадамлик шахматчиларимизга чемпионликни тақдим этадими? Бугун cўнгги 9-турда ҳаммаси ҳал бўлади

Мукофот жамғармаси 166 000 АҚШ долларини ташкил этувчи мусобақада бугун сўнгги 9-тур партиялари ўйналади. Бугунги учрашувлар соат 12:00да бошланади. "Masters" гуруҳида 5 очко билан қўшимча кўрсаткичларга кўра пешқадамлик қилаётган Нодирбек Абдусатторов (2766) 4,5 очкога эга бўлиб турган сербиялик Алексей Сарана (2712)га қарши оқ доналарда ўйнайди. 

Иккинчи поғонадан жой олган Нодирбек Якуббоев (2634) оқ доналарда Ю Янг Йи (Хитой, 2715) билан ҳисоб-китоб қилади. Янг 4,5 очко билан учинчи ўринни эгаллаб турибди. Тўрт очкога эга Жавоҳир Синдаров (2688) эса оқ доналарда Александр Гришук (FIDE, 2719) билан муносабатларига ойдинлик киритиб олади. 

"Uzchess Cup". "Masters" гуруҳи. 9-тур жуфтликлари

Нодирбек Абдусатторов (Ўзбекистон, 2766) - Алексей Сарана (Сербия, 2712) 

Парҳам Мақсудлу (Эрон, 2733) - Видит Сантош Гужратҳи (Ҳиндистон, 2721) 

Шахрияр Мамедьяров (Озарбайжон, 2734) - Ричард Раппорт (Руминия, 2715) 

Нодирбек Якуббоев (Ўзбекистон, 2634) - Ю Янг Йи (Хитой, 2715) 

Жавоҳир Синдаров (Ўзбекистон, 2668) - Александр Гришук (FIDE, 2719) 

"Challengers" гуруҳининг 9-турида турнир жадвалида пешқадам бўлиб турган ҳамюртимиз Шамсиддин Воҳидов (2624) оқ доналарда Абҳижит Гупта (Ҳиндистон, 2589) билан муносабатига ойдинлик киритиб олади. Шамсиддин сингари 5,5 очкога эга ва иккинчи ўринни эгаллаб турган Александр Предке (Сербия, 2667) қора доналарда германиялик Александр Донченко (2639)га қарши баҳс олиб боради. Яна бир гроссмейстеримиз Жаҳонгир Воҳидов (2580) эса сўнгги турда қора доналарда норвегиялик гроссмейстер Евгений Романов (2577) билан ҳисоб-китоб қилади. 

"Futures" гуруҳида қўшимча кўрсаткичларга кўра 1-ўринда бораётган истеъдодли шахматчимиз Муҳаммадзоҳид Суяров (2430) 9-турда яна бир ҳамюртимиз Саидакбар Сайдалиев (2448)га қарши қора доналарда ҳаракат қилади. Саидакбар Муҳаммадзоҳиднинг чемпион бўлишига тўсқинлик қилармикан? Буни бугунги партия кўрсатиб беради. Қизиғи, Суяров сингари 5,5 очкога эга бўлиб турган Виталий Сивук (Швеция, 2569) ва Бардия Данешвар (Эрон, 2611) сўнгги 9-турда ўзаро тўқнаш келишади. Бу Суяров учун айни муддао.